Məktəbli geyimləri ilə bağlı yeni qərar qəbul edildi
Nazirlər Kabineti dövlət ümumi təhsil müəssisələrində şagirdlərin geyim formaları ilə bağlı qərara dəyişiklik edib.
Azərbaycan Respublikası Nazirlər Kabinetinin 2022-ci il 17 mart tarixli 96 nömrəli Qərarı ilə təsdiq edilmiş “Dövlət ümumi təhsil müəssisəsi təhsilalanlarının geyim formalarının təsvirləri”ndə dəyişiklik edilməsi haqqında Qərar qəbul olunub. Qərar 21 sentyabr 2026-cı il tarixində yayımlanıb.
Qərarda məktəbli formasının tətbiqi ilə bağlı əsas yanaşmalar da diqqətə çatdırılır.
Məktəbli formasının əsas məqsədi nədir?
Məktəbli formasının tətbiqi məktəb mühitində vahid, səliqəli, rahat və təhsil prosesinə uyğun geyim mədəniyyətinin formalaşdırılmasına xidmət edir.
Qeyd olunur ki, məktəb mühitində əsas prinsiplərdən biri bərabərlikdir. Şagirdlərin sosial statusundan, ailənin maddi imkanlarından, etnik və dini mənşəyindən asılı olmayaraq eyni şərtlərdə təhsil alması və eyni imkanlara sahib olması nəzərdə tutulur.
Forma sosial fərqlərin azalmasına necə təsir edir?
Vahid məktəbli geyiminin şagirdlər arasında sosial-iqtisadi fərqlərin daha az nəzərə çarpmasına, ayrı-seçkilik risklərinin azalmasına və vahid məktəb mühitinin formalaşmasına xidmət etdiyi vurğulanır.
Eyni zamanda, məktəbli forması şagirdlərdə kollektivə aidlik, məsuliyyət və məktəb kimliyi hissinin formalaşmasına müsbət təsir göstərən vasitələrdən biri kimi təqdim edilir.
Məktəbli geyimi yalnız geyim məsələsi deyil
Qərarla bağlı əsas yanaşmalara görə, məktəbli geyimi məsələsi yalnız xarici görünüşlə bağlı deyil. Bu məsələ həm də təhsil fəlsəfəsi, bərabərlik, məktəb mühiti və sosial adaptasiya ilə əlaqələndirilir.
Geyim formasının isə şagirdlərin yaş xüsusiyyətlərinə, tədris prosesinə və rahat istifadəyə uyğun, praktik prinsiplər əsasında müəyyən edilməsi nəzərdə tutulur.
Bununla yanaşı, təhsil müəssisələrində daxili nizam-intizam qaydalarına riayət olunması şagird və valideynlər üçün vacib şərt olaraq qeyd edilir.
Məktəbli geyim qaydalarına əməl olunmasının məktəb-valideyn əməkdaşlığının gücləndirilməsinə və təhsil prosesinə dəstək verməsinə diqqət çəkilir.
Qeyd: 2022-ci ildə təsdiq edilmiş qaydalara əsasən, dövlət ümumi təhsil müəssisələrində məktəbli geyimlərinin forması məktəbin Pedaqoji Şurasının qərarı ilə müəyyən edilir və seçilmiş dəst ən azı 3 tədris ili dəyişdirilmədən tətbiq olunur.
Nazirlər Kabinetinin qərarı: Qərarın tam mətni
